Donostiako Easo Politeknikoa LHIIn urte asko daramagu lanean gure jarduerak sortzen duen ingurumen-inpaktua ahalik eta txikiena izan dadin, hezkuntza-komunitatea sentsibilizatu nahian jasangarriagoak izatera eramango gaituzten ohiturak eta konpromisoak har ditzan. Horren adierazgarri dira egin diren sentsibilizazio-kanpaina ugari, bereziki Ingurumen Hezkuntza eta Kontrola goi mailako zikloko ikasleek eta irakasleek egindakoak, baita Agenda 21 batzordearen ekimenak edo ISO 14001:2015 eta eskolako A21 Eskola Jasangarriaren ziurtagiriak lortu izana ere.

Kutsadurari eta klima-aldaketari buruzko egungo arazoak direla eta, Easo Politeknikoak 2015/16 ikasturtetik aurrera erabilerraza izango den karbono-aztarna kalkulatzeko tresna bat sortzen dihardu. Helburua bere jarduerak sortzen dituen berotegi-efektuko gasen emisioak neurtzea, emaitzak aztertzea eta emisio horiek arintzeko ekintzen konpromisoa hartzea da.

Pertsona guztioi dagokigun gaia izanik, Easo Politeknikoak tresna hau beste ikastetxeekin eta beste erakundeekin partekatu nahi du, ingurumen-kontzientzia areagotzen laguntzeko, beren egoeraren analisia eta hartu beharreko neurriak zehaztea errazteko, murgilduta gauden krisi klimatikoaren aurkako borrokan lagun dezagun pertsona guztien artean.

Horregatik, Donostiako Zubiri-Manteo BHIko informatikako ziklo batek eta Easo Politeknikoko Ingurumen Hezkuntza zikloak elkarlanean egindako erreminta hau argitaratu dugu, beste edozein hezkuntza-komunitatek edo erakundek erabili ahal izan dezan.

Erabilgarria izatea espero dugu eta ingurumen aztarna gero eta txikiagoa izan dadin gure konpromisoa handitzen laguntzea.